Mtibwa Sugar leo majira ya saa 10 jioniwanatarajiwa kushuka dimbani kwenye Uwanja wao wa nyumbani wa Manungu, Turiani dhidi ya ndugu zao Kagera Sugar ikiwa siku moja tu tangu walipoachana rasmi na kocha wao Habibu Kondo.
Kwa kile kilichoonekana kutokuwa na muendelezo wa matokeo mazuri kwenye michezo 5 iliyopita wakiambulia alama 2 pekee kati ya 15 na kupoteza mchezo wao wa mwisho kabla ya leo dhidi Tanzania Prisons kwa 3-2 na kuiweka timu kwenye nafasi ya 15 kwenye msimamo, uongozi wa Mtibwa umeona ni vema kuachana na mwalimu huyo mapema ili kuunusuru msimu.
Kocha wa muda ,Awadh Juma “Maniche”, ataiongoza timu hiyo leo kujaribu kutafuta ushindi wao wa kwanza wa msimu huu dhidi ya Kagera Sugar ya Mecky Mexime na yeye amekiri ugumu wa mchezo huo.
Tunafahamu tunaenda kucheza mchezo mgumu, kwanza ni derby na wote tunataka alama 3 kwenye mchezo huo ili kila mtu atimize malengo yake. Wachezaji wangu wako tayari kwa mchezo ni wachezaji wachache tu watakosekana kutokana na sababu mbalimbali lakini nna kikosi kipana.
Timu zote mbili zinapenda kucheza mpira hivyo utakuwa mchezo mzuri. Tunaomba mashabiki wetu waje kwa wingi kama walivyokuja kwenye mchezo dhidi ya Singida, licha ya kupoteza lakini walitupa hamasa kubwa sana.
Alimaliza Maniche.
