TEN HAG AWOMBA RADHI MASHABIKI MAN UNITED.

Kocha mkuu wa kikosi cha Manchester United Erik Ten Hag amekuwa na wakati mgumu kutokana na mashinikizo kadhaa ya mashabiki na wachambuzi wa soka nchini England kumtaka aachie ngazi klabuni hapo.

Jana Manchester United imetolewa kwenye mashindano ya Carabao Cup baada ya kupokea kichapo cha goli 0-3 kutoka kwa Newcastle United. Baada ya mchezo huo Erik Ten Hag alikiri kuwa kwasasa timu yake ipo kwenye wakati mgumu lakini watarejea wakiwa imara zaidi.

Mimi ni mpambanaji. Ninaamini tutafanya vizuri, lakini ni wazi kwamba kwasasa tupo kwenye nafasi mbaya, Nawajibika lakini naona kama changamoto, nahitaji kukaa na wachezaji ili tupambane pamoja.

Tunajua hii sio nzuri sana, nitawajibika, najihisi huzuni lakini mashabiki wanisamehe, wachezaji watasimaa pamoja, wana umoja nadhani mmeona wamejitahidi, tunapaswa kucheza kama timu, hiyo ndio njia pekee.

Kila mmoja anapaswa kuwajibika, kujituma na kuonyesha ushirikiano. Hilo ndio neno mhimu kwetu.

Erik Ten Hag baada ya kipigo cha 0-3 kutoka kwa Newcastle United.

Awali kabla ya mchezo huo kuanza kocha wa Huddersfield Neil Wornock alisema Erik Ten Hag amefanya usajili wa gharama kubwa kwa wachezaji ambao hata yeye kwenye kikosi chake wasingepata nafasi ya kusajiliwa.

Sidhani kama atakaa muda mrefu, sina hakika kama na yeye anataka pia, baadhi ya wachezaji aliowanunua kwa gharama kubwa Euro Million 60/70 nisingekuwa nao hata huddersfield.

Neil Wornock, kocha wa Huddersfield

Hii ni mara ya pili mfululizo Manchester United inapoteza mchezo kwa magoli 0-3 katika uwanja wake wa nyumbani Old Trafford, ilipoteza dhidi ya Manchester City na jana dhidi ya Newcastle United.

Manchester United imepoteza michezo nane (8) kabla ya mwezi November kuisha kwa mara ya kwanza tangu msimu wa 2001/02. Mara ya mwisho kupoteza michezo nane (8) kwenye michezo 15 ya kwanza ilikuwa msimu wa 1972/73 baada ya matokeo hayo wakamfuta kazi kocha.

MATOKEO YA MICHEZO MINGINE CARABAO CUP

• Manchester United 0-3 Newcastle United.
• Bournemouth 1-2 Liverpool.
• Westham United 3-1 Arsenal
• Chelsea 2-0 Blackburn Rovers.
• Everton 3-0 Bunley
• Ipswich 1-3 Fulham.