Manchester United wamepata pigo lingine wiki hii baada ya mlinda mlango Andre Onana kulazimika kutoka nje wakati wa mechi ya Cameroon dhidi ya Mauritius.
Mlinda mlango huyo alitolewa zikiwa zimesalia chini ya dakika 10 timu yake iliposhinda 3-0 katika mechi ya kufuzu kwa Kombe la Dunia siku ya Ijumaa huku akitoka nje ya uwanja akiwa na Fabrice Ondoa akichukua nafasi yake.
Jeraha hilo linaleta wasiwasi mkubwa kwa meneja wa United Erik ten Hag kutokana na orodha ndefu ya mmajeruhi kwa Mashetani Wekundu. Mshambuliaji Rasmus Hojlund na Christian Eriksen wote walilazimika kuondoka kwenye majukumu ya kimataifa baada ya kupata majeraha. Wakati huo huo mabeki Jonny Evans, Lisandro Martinez na Tyrell Malacia wote wako nje na kiungo Casemiro akikosekana hadi Januari.
Bado haijajulikana kama Onana ataichezea Cameroon watakapokutana na Libya siku ya Jumanne. Man Utd watarejea katika mechi ya Ligi Kuu ya Uingereza watakaposafiri kucheza na Everton Jumapili, Novemba 26.
