KOCHA SIMBA HAANGALII MAJINA BALI UWEZO.

Kocha wa klabu ya Simba Abdelhak Benchikha amesema ana malengo makubwa na klabu ya Simba na ni mpambanaji kwahiyo ataipambania klabu hiyo mwanzo mwisho hadi mafanikio yapatikane.

Benchikha ameweka wazi kuwa atamtumia mchezaji anayeonyesha kiwango, maswala ya kuangalia majina kwa upande wake hayapo kabisa.

“Nina furaha kubwa kuwepo hapa. Tangu nilipoanza kuwasiliana na viongozi nilikuwa na shauku ya kuja. Jambo kubwa ambalo naomba ni mashabiki kutupa ushirikiano na naamini kupitia hilo tutafanikiwa pamoja.”

“Kuna mambo mengi ambayo tayari nayajua na nimekuja na mikakati ambayo taifanyia kazi. Kuhusu wachezaji tajua zaidi nikishaanza kazi, kuhusu mashindano ya ndani na kimataifa yote ni muhimu. Mimi ni mpambanaji na nitapambana hadi tutafika.”

“Mafanikio yatajengwa na Wanasimba wote hilo ndio muhimu zaidi. Kwa wachezaji sitaangalia majina bali anayefanya vizuri, kiwango cha mchezaji ndio kitafanya nimtumie.”- Kocha mkuu Abdelhak Benchikha.

Kibarua cha kwanza kwa kocha Abdelhak Benchikha kitakuwa kwenye mchezo wa Ligi ya mabingwa Barani Afrika dhidi ya Jwaneng Galaxy utakaopigwa nchini Botswana mwishoni mwa wiki hii.