Vigogo wa Ligi Kuu Tanzania Bara, Simba, Yanga na Azam wamepewa vibonde katika hatua ya kusaka tiketi ya 32 bora kwenye mashindano ya Kombe la Shikisho la Azam (ASFC). Katika Droo iliyopangwa leo Novemba 29 imeshirikisha jumla ya timu 64 kusaka taji Azam Sport Federation Cup.
Mabingwa watetezi Yanga watakutana na Hausung ya daraja la kwanza wakati Simba wakiwakaribisha Tembo FC Mabingwa wa Ligi ya Mkoa wa Tabora huku Azam wakiwa wenyeji wa Alliance kutoka Mwanza.
Kwa mujibu wa droo hiyo, mechi 32 za raundi ya tatu ambazo zitachezwa kati ya Desemba 15 hadi 17 mwaka huu ni kama ifuatavyo, Singida Foutain Gate itaikaribisha Arusha City, KMC itacheza dhidi ACA Eagle.
Dodoma Jiji watavaana na Magereza FC, JKT Tanzania watacheza dhidi ya Kurugenzi FC, Kagera Sugar wao watacheza dhidi ya Dar City, Geita Gold watacheza na Singida Cluster, Namungo FC wataikaribisha Hollywood FC.
Tabora United watavaana na Monduli Coffee ya Arusha, Coastal Union watacheza dhidi ya Greenland FC, Ihefu wataikaribsha Rospa FC, Tanzania Prisons wao dhidi ya TRA Kilimanjaro, Mtibwa Sugar watacheza dhidi ya Nyakagwe, huku timu ya Mashujaa FC itacheza dhidi ya Mbuga FC.
