Namungo wamefanikiwa kupata ushindi wa bao 1-0 dhidi ya Dodoma Jiji kwa Bao la Pius Buswita dakika ya 56 kwenye mchezo wa ligi kuu Soka Tanzania Bara na kusogea hadi nafasi ya 8 kwenye msimamo wakifikisha alama 14.
Mchezo ulianza kwa timu zote kucheza kwa tahadhari lakini pia wakishambuliana kwa kupishana. Magolikipa wote wawili walikuwa na kazi za kufanya dakika za mwanzo, Sio Mohamed Mohamed wala Jonathan Nahimana.
Burudani ya soka ilinogeshwa eneo la kiungo kama ilivyotabiriwa. Palikuwa na Ufundi kutoka kwa viungo wa timu zote mbili, Frank Domayo na Hamisi Khalifa, Jacob Massawe na Hamadi Majimengi upande wa Namungo lakini Mtenje Albano na Gustapha Simon wakipiga shoka huku Iddy Bahati Kipagwile na Salmini Hozza wakilainisha upande wa Dodoma Jiji.
Hata hivyo pamoja mpaka tunakwenda mapumziko, Namungo 0-0 Dodoma Jiji.
Kipindi cha pili kilianza kwa Dodoma Jiji kufanya mabadiliko ya kiufundi kwa kumuingiza Aboubakar Ngalema na kumpumzisha Emmanuel Martin huku Mwana Kibuta akichukua nafasi ya Salmin Hozza kuongeza kwenye maeneo hayo mawili. Namungo hawakuingia na mabadiliko yoyote.
Dakika ya 56 Namungo walitangulia kupata bao la kuongoza kupitia kwa Pius Buswita akipokea pasi nzuri ya usaidizi kutoka kwa Mshambuliaji mwenzake Reliants Lusajo baada ya mabeki wa Dodoma Jiji kujichanganya wenyewe. Buswita akifunga bao lake la 4 msimu huu.
Mchezo uliendelea kushika kasi huku Dodoma Jiji wakitafuta goli la Kujibu lakini bado Namungo waliendelea kusimama imara hasa Nahimana langoni. Kuingia kwa Meshack Abraham paliongeza uhai kwenye safu ya ushambuliaji ya Dodoma Jiji lakini bado jitihada hazikuzaa matunda.
Namungo walidhani wamepata bao la pili dakika ya 87 ya mchezo Pius Buswita akiwa kwenye nafasi ya wazi ya kufunga lakini aliishia kuwainua tu mashabiki na benchi la ufundi la timu yake baada ya kufanya ndivyo sivyo. Dakika hizi Namungo walifanya mabadiliko kwa kuwatoa Hamadi Majimengi na kumuingiza Hashim Manyanya.
Dakika 4 za nyongeza za muamuzi Rapahel Ikambi bado hazikuweza kuwa na msaada kwa Dodoma Jiji kuepukana na kipigo. Mpaka filimbo ya mwisho, Namungo 1-0 Dodoma Jiji.
