MATOKEO MATATU KUIPELEKA TWIGA STARS WAFCON.

Timu ya Taifa ya Wanawake ya Tanzania ‘Twiga Stars’ leo inahitaji matokeo ya aina tatu dhidi ya wenyeji wao Togo ili ifuzu Fainali za Mataifa ya Afrika kwa Wanawake (WAFCON) zitakazofanyika mwakani nchini Morocco.

Ushindi wa mabao 3-0 ilioupata katika mechi ya kwanza nyumbani Alhamisi iliyopita unaifanya Twiga Stars ihitaji ushindi, sare au kupoteza kwa mabao yasiyozidi mawili ili itinge WAFCON.

Endapo itafanikiwa kufuzu itamaliza kiu ambayo imekuwa nayo kwa miaka 13 ya kutamani kushiriki fainali hizo tangu ilipofanya hivyo kwa mara ya kwanza na ya mwisho mwaka 2010 iliposhiriki fainali zilizofanyika Afrika Kusini na kushika mkia.

Baada ya hapo, Twiga Stars haijashiriki fainali za WAFCON kwa awamu tano mfululizo na mara kwa mara ilikuwa ikiishia katika raundi ya kwanza ya mashindano ya kufuzu ikikwama mbele ya Zambia, Namibia, Zimbabwe na Ethiopia.