Mwanariadha wa Afrika Kusini Oscar Pistorius ameachiliwa kwa msamaha leo Januari 05, 2024 ikiwa ni takriban miaka 11 baada ya kumuua aliyekuwa mpenzi wake, Reeva Steenkamp katika tukio ambalo nyota huyo wa zamani wa Olimpiki alidai kuwa ni kitendo cha kujilinda.
Pistorius alimuua Steenkamp, mhitimu wa sheria na mwanamitindo akiwa umri wa miaka 29 wakati huo kwa kufyatua risasi nne kupitia mlango wa bafuni nyumbani kwake Pretoria mapema siku ya wapendanao mwaka 2013.
Pistorius, ambaye sasa ana umri wa miaka 37, amekuwa akisema mara kwa mara kwamba aliamini kwamba alikuwa akimpiga risasi mvamizi wakati mpenzi wake alikuwa amelala kitandani mwake.
Waendesha mashtaka walidai kuwa alimuua kimakusudi wakati wa mabishano ya usiku wa manane.
Nyota huyo wa mbio fupi, ambaye amekuwa mlemavu wa miguu miwili tangu utotoni na aliyepewa jina la “Blade Runner” kwa miguu yake ya bandia ya nyuzi za kaboni, alihukumiwa kifungo cha miaka 13 na miezi mitano jela kufuatia kesi ambayo ilitikisa ulimwengu.
