Tabora United na Namungo wametoshana nguvu kwenye mchezo wa ligi kuu Tanzania Bara uliopigwa kwenye dimba la Ali Hassan Mwinyi mkoani Tabora baada ya kutoka sare ya bao 1-1.
Tabora United walitangulia kupata bao dakika ya 11 ya mchezo kupitia mshambuliaji wao hatari Erick Okutu akimalizia kazi nzuri ya Jackson Mbombo aliyemchambua mlinzi Erasto Nyoni kabla ya kumpasia pasi laini na yeye kupiga shuti lililomshinda mlinda mlango Jonathan Nahimana.
Hili lilikuwa bao la 5 kwa Okutu akiwa na jezi ya Tabora United msimu huu.
Namungo walipata bao la kusawazisha kupitia kwa Pius Buswita dakika ya 37 na kufanya ubao kusomeka 1-1 kabla ya kwenda mapumziko.
Kipindi cha pili kilirejea kwa timu zote kujaribu kusukuma mashambulizi kupata bao la ushindi lakini pia wote walikuwa imara kiulinzi.
Licha ya uwanja pia kutokuwa rafiki kutokana na mvua zilizonyesha mkoani Tabora lakini timu zote zilijitahidi kuonyesha kandanda safi.
Kipindi cha pili hakikuzaa goli lolote na kufanya mchezo kumalizika kwa sare ya 1-1.
Tabora United wanashindwa kuvuna alama 3 tena kwenye uwanja wao wa Nyumbani baada ya kukubalia kichapo cha mabao 4-0 kutoka kwa Simba kwenye mchezo uliopita.
