Nyota wa kimataifa wa Tanzania Novatus Dismas leo atashuka Dimbani kwenye mchezo wa Europa akiwa na klabu yake ya Shakhtar Donetsk kuikabili Marseille majira ya saa 20:45 usiku.
Mchezo huo utapigwa katika uwanja wa Volksparkstadion uliopo Hamburg nchini Ujerumani.
Novatus amekuwa hapati namba mara kwa mara kwenye kikosi cha Shakhtar tangu Marino Pusic raia wa Bosnia & Herzegovina alipotangazwa kuwa kocha mkuu wa kikosi hicho.
Novatus Dismas yupo kwa mkopo kwenye klabu ya Shakhtar akitokea klabu ya Zulte ya nchini Ubelgiji, baada ya kukosa namba kwa nyota huyo mwanahabari za michezo mkongwe nchini Shaffih Dauda ameweka sababu za Novatus kukosa namba kwenye kikosi cha Shakhtar.
“Novatus Dismas kipindi ambacho hachezi nilimwambia, wewe una miaka minne umetokea Biashara unataka ucheze, unahisi una haki kuliko aliyezaliwa ulaya, unapopata usihisi ni haki yako kupata kila siku”
“Shkatar wao wakichukua wachezaji vijana wanataka wammiliki asilimia 100, waligoma kumchukua kwa mkopo Nova, walitaka wamchukue mazima”.
“Shaktar haimpi nafasi mchezaji aliyepo kwa mkopo kwasababu wataongeza thamani ya mchezaji wa timu nyingine licha ya kwamba mkataba wa Novatus una kipengele cha kumnunua”, alisema Shaffih.
Kwa upande wa mchambuzi wa soka nchini Farhan Kihamu ameweka wazi kuwa kama Novatus Dismas atasajiliwa timu kubwa Barani Ulaya itakuwa faida kwa Tanzania.
“Kama itafanyika biashara ya kwenda timu kubwa basi ni faida kwa Tanzania, ukimtazama Novatus anavyocheza ni tofauti na alivyokuwa Biashara United”, alisema Farhan.
Matarajio kwa watanzania ni makubwa wakihitaji kumuona anarejea tena uwanjani nyota Novatus Dismas baada ya kumuona kwenye michezo kadhaa ya kirafiki ya klabu hiyo iliyochezwa hivi karibuni.
