Azam FC wamefanikiwa kupata ushindi wa bao 1-0 mbele ya wenyeji wao Singida FG kwenye mchezo wa ligi kuu Tanzania Bara uliopigwa kwenye dimba la CCM Kirumba, Mwanza.
Azam FC walipata nafasi ya mapema baada Feisal Salum kufanyiwa madhambi nje kidogo ya eneo la Singida FG lakini mpira wa adhabu uliopigwa na Ayoub Lyanga uliokolewa vizuri na Beno Kakolanya.
Singida FG walijibu kupitia kwa Habibu Kyombo ambaye alimchungulia golikipa Mohamed Mustafa lakini alikuwa sambamba na mpira huo.
Hapakuwa na nafasi nyingi kipindi cha kwanza cha mchezo huu na timu zote zilienda mapumziko zikiwa suluhu, 0-0.
Mapema tu kipindi cha pili, Azam walionyesha nia ya dhati ya kuutaka mchezo, Kipre Jr. Alipata nafasi ya wazi lakini shuti lake lilibabatiza walinzi wa Singida FG.
Azam FC walipata bao la utangulizi dakika ya 53 kupitia kwa Kipre Jr. aliyepokea mpira kutoka kwenye papatupapatu ya Feisal Salum na walinzi wa Singida FG kisha naye kuwachambua walinzi waliobakia na kupiga shuti dogo la chinichini lililomshinda Beno Kakolanya.
Singida FG waliwatambulisha Thomas Ulimwengu na Yusuf Kagoma nafasi za Azizi Andambwile na Nicholas Gyan wakifanya mabadiliko ya kiufundi kujaribu kuimarisha eneo la kiungo na ushambuliaji, Lakini pia Nicholas Wadada akichukua nafasi ya majeruhi Kelvin Kijiri.
Wakionekana wamebadilika pia kiuchezaji tangu wafanye mabadiliko hayo, Singida FG walidhani wamepata goli la kusawazisha kupitia kwa Francy Kazadi dakika ya 72 lakini bao lake lilikatawaliwa kwa kibendera cha muamuzi msaidizi namba 2 kuwa ameotea.
Azam FC waliamua kuongeza nguvu kwenye safu ya ulinzi kwa kumuingiza Nathaniel Chilambo na Adolf Mtasingwa kuongezeka eneo la kiungo akichukua nafasi ya Feisal Salum kipindi ambacho Singida FG wakionekana kuongeza kasi ya mashambulizi kupitia kwa Thomas Ulimwengu, Francy Kazadi, Habibu Kiyombo huku akiongezeka pia Enock Atta Agyei.
Dakika zote 90 zikatamatika kwa Azam FC kuibuka na ushindi muhimu wa bao 1-0 baada ya kushindwa kupata alama 3 kwenye michezo miwili iliyopita.
Baada ya mchezo kuisha, Kocha wa Singida FG Thabo Senong alisema
Licha ya kupoteza mchezo lakini vijana wangu wameonyesha kuwa wanaweza kupata matokeo kwenye michezo ijayo. Azam ni timu kubwa na nzuri na siku zote ukifanya makosa mbele ya ya timu yenye wachezaji wenye ubora watakuadhibu na ndicho kilichotokea. Nawapongeza Azam lakini pia nawasifu wachezaji wangu.
Naye Kocha wa Azam FC, Youssouph Dabo alisema
Kwanza tulicheza kwa ajili ya Dokta Mwankemwa na tunatoa sana pole kwa familia yake. Tulijua lazima tushinde kwa ajili yake. Kweli leo tulicheza bila mshambuliaji hata mmoja lakini viungo wangu wote wana uwezo wa kushambulia pia. Umeona leo Kipre katupa ushindi lakini bado alikuwa na uwezo wa kufunga mengi zaidi lakini nashukuru kwa ushindi huu muhimu kabisa.
Matokeo haya yanaifanya Azam FC kusalia nafasi ya 2 baada ya michezo 18 kwa kufikisha alama 40. Singida FG wakishuka hadi nafasi ya 8 baada ya kipigo hiko wakisalia na alama zao 21.
Kwingineko kwenye dimba la Shule ya Sekondari ya Wasichana ya Nyankumbu, Wenyeji Geita Gold wametoka suluhu ya 0-0 dhidi ya Kagera Sugar.
Licha ya kucheza vizuri lakini walishindwa kutumia nafasi zao walizozitengeneza kupitia kwa Tariq Seif lakini pia Yusuf Mhilu akikosa nafasi ya wazi.
Huu ni mchezo wa 5 mfululizo, Geita Gold wanakosa kupata ushindi kwenye mchezo wa ligi kuu Tanzania Bara.
Matokeo haya yanawafanya Geita Gold kusalia nafasi yao ya 14 wakifikisha alama 17 huku Kagera Sugar wakichumpa hadi nafasi ya 7 wakifikisha alama 22.
