IHEFU YAITAMBIA KMC

Timu ya soka ya Ihefu imefanikiwa kuvuna alama zote 3 na kusogea hadi nafasi ya 7 wakifikisha alama 23 baada ya kuibuka na ushindi wa bao 1-0 dhidi KMC ambayo imetimiza mechi 9 bila kushinda kwenye mchezo wa ligi kuu Tanzania Bara uliopigwa kwenye Uwanja wa CCM Liti, Singida.

Ihefu walitangulia kupata bao dakika ya 20 kupitia kwa Nahodha wao Joash Onyango aliyeupalaza kwa kichwa krosi nzuri ya Mkenya mwenzie Duke Abuya kutoka kwenye pigo huru.

KMC walionekana kutaka kujibu mapigo mapema mapema, Ibrahim Elias ambaye alikuwa kwenye kiwango bora sana hii leo alipata nafasi nje kidogo ya eneo la 18 la Ihefu lakini shuti lake liliokolewa vizuri na golikipa Aboubakar Khomeiny.

Ihefu walipiga hodi kwa KMC tena kupitia upande wa Joseph Petro Mahundi aliyepiga krosi nzuri lakini Elvis Rupia alichelewa na golikipa Wilbol Maseke kuokoa shambulizi hilo.

KMC Walipata faida ya pigo Huru nje. Ibrahim Elias alipiga mpira vizuri lakini Khomeiny alikuwa sambamba na pigo hilo.

Ihefu walienda mapumziko wakiwa mbele kwa bao 1-0.

Kipindi cha pili KMC walimtambulisha mfungaji wao kinara, Waziri Junior akichukua nafasi ya Remtidius lakini pia mlinzi wa kushoto Rahim Shomary akiingizwa nafasi ya Winga George William Makang’a kama kuongeza kasi ya kushambulia lakini pia ulinzi wa haraka unapohitajika.

Dakika ya 50, Shaaban Iddy Chilunda alitaka kufunga kwa mtindo akiunganisha krosi nzuri ya Ibrahim Elias lakini mpira wake ulipaa juu kidogo ya lango.

Ihefu nao walifanya mabadiliko kwa kumuingiza Morice Chukwu nafasi ya Amadou Momade.
Dakika ya 74 KMC nao wakafanya tena mabadiliko kwa kumuingiza Akram Muhina Deogratius Anthony na Daruwesh Saliboko nafasi za Ibrahim Elias, Shaaban Iddy Chilunda
Huku Ihefu nao wakimuingiza Raphael Daud Loth nafasi ya Ernest Malonga.

Mechi haikuwa na mashambulizi mengi kipindi cha pili hasa yale ya hatari.

Waziri Junior alijitengenezea nafasi nzuri ya kupiga shuti akiwa ndani ya eneo la penati la Ihefu lakini shuti lake lilipaa juu ya lango.

Ihefu walifanikiwa kushikilia Uongozi wao mpaka dakika ya 90 ya mchezo na kufanikiwa kuibuka na ushindi wa bao 1-0.