Goli la dakika ya 90+5 la Haruna Chanongo zikiwa zimeongezwa dakika 5 lilitosha kuipa timu yake ya Pamba Jiji bao muhimu la kusawazisha na kuwapa alama 1 kwenye mchezo wa Championship kati yao na Vinara wa ligi hiyo Kengold uliopigwa kwenye dimba la Sokoine, Mbeya.
KenGold walikuwa mbele kwa mabao 2-1 kupitia kwa magoli ya Edgar William, wakati wakiamini kuwa imeisha na alama zote 3 zinakwenda kwao, dakika za mwisho Kabisa Haruna Chanongo anapiga shuti kali lililombabatiza mlinzi wa KenGold na kumpoteza golikipa wake, Mhagama na kufanya matokeo kuwa 2-2.
Alama hiyo 1 imeonekana kuwa muhimu kwenye mbio za kuwania nafasi 2 za juu za kufuzu moja kwa moja hasa kwa upande wa Pamba Jiji ambao kama wangepoteza basi kungekuwa na mwanya mkubwa wa alama kati yao na KenGold wa alama 8 Lakini sasa inabaki kuwa alama 5. KenGold wakiwa na alama 60, Pamba Jiji wakiwa nafasi ya 2 na alama 55.
Hata hivyo, Pamba Jiji bado hayuko salama kwenye nafasi hiyo kwani Biashara United ambao wapo nafasi ya 3 wakiwa na alama zao 53 wana nafasi ya kuwashusha kama watashinda mchezo wao wa leo dhidi ya Mbeya Kwanza kwenye dimba la Nangwanda Sijaona, Mtwara.
Zikiwa zimesalia takribani mechi 5-4, Ligi ya Championship ipo kwenye kilele cha utamu wa aina yake.
