YANGA YAKARIBIA MABADILIKO

Klabu ya Soka ya Yanga imeingia kwenye hatua nyingine ya kukamilisha mchakato wake wa mabadiliko wa uendeshaji wa Klabu hiyo.

Akizungumza na waandishi wa habari hii leo, Rais wa Klabu hiyo Mhandisi Hersi Said alisema kuwa Yanga inaelekea kwenye hatua za mwisho za kukamilisha mchakato wa mabadiliko ya kiuendeshaji na kamati maalumu imeteuliwa kusimamia mchakato huo.

Kuna mengi tumeshayatekeleza kuelekea kukamilisha mchakato huu na Excom imeketi na kuona ni vema sasa hapa tulipofikia tukae pembeni na tukabidhi majukumu kwa Kamati maalumu kuanzia hapa tulipo mpaka tamati ya mchakato huu.

Mhandisi Hersi Said aliongeza pia kuwa licha ya kuwa wanaunda kamati huru lakini haina maana kuwa hawatoitolea macho kuhakikisha wanatekeleza majukumu yao.

Kamati itakuwa chini ya Alex Mgongolwa huyu pia alikuwa Mwenyekiti wa Kamati ya Mchakato wa Mabadiliko tangu mwanzo na amefanya kazi kubwa sana mpaka kutufikisha hapa tulipo na ndio maana Excom ikammpitisha kuwa Mwenyekiti wa kamati hiyo. Sisi tutachofanya ni “Hands Off, Eyes On” (Tunatoa Mikono ila Macho yatatizama) kuhakikisha kila kitu kinaenda sawa.

Ikumbukwe Yanga inasimamia Dira yake ya mabadiliko na Kamati hii itafanya kazi ya Kupitia mambo kadha wa kadha ikiwemo kujua thamani hasa ya Klabu ili kuweka mchakato mzuri wa ununuaji Hisa asilimia 49 zitazotolewa kwa wawekezaji baada ya uundwaji wa Kampuni kukamilika.