Timu ya Geita Gold imefanikiwa kufuzu hatua ya Robo Fainali ya michuano ya CRDB BANK Sports Federation Cup baada ya kuibugiza Rhino Rangers mabao 2-1.
Geita Gold walitangulia kupata bao dakika ya 2 tu mchezo kupitia kwa kiungo wake Jonathan Ulaya lakini dakika ya 10, Rhino Rangers walisawazisha kupitia kwa Macky Simon aliyepiga shuti lililompalia Golikipa Sebusebu Samson.
Alikuwa ni Elias Maguli dakika ya 21 aliyetumia madhaifu ya walinzi waliodhani yupo katika nafasi ya kuotea na kuukwamisha mpira wavuni na kuhakikisha Geita Gold wanakata tiketi ya kusonga mbele kwenye mashindano hayo.
Baada ya mchezo makocha wote walitoa tathmini zao huku Kocha Athumani Bilali “Bilo” alisema:
Uchovu umetugharimu pakubwa na ndio maana hata tukaruhusu bao la mapema maana juzi tu tumetoka kucheza mechi Tabora sasa kusafiri hadi hapa lakini hata hivyo nawapongeza vijana wangu wamepambana. Licha ya kwamba tumetolewa lakini tumecheza vizuri na tunachukua hii kama chachu ya kufanya vizuri zaidi kwenye ligi.
Naye kocha wa Geita Gold, Denis Kitambi alisema:
Nadhani kikubwa ilikuwa ni kupata ushindi kwanza siwezi kusema kuwa tumecheza vizuri sana lakini tumefanikiwa kufuzu. Tulianza vizuri dakika za mwanzo lakini baada ya kupata uongozi haukuwepo tena ule uchu wa kuimaliza mechi kabisa na tuliambizana turekebishe lakini pia kuumia kwa Edmund John kulinilazimu kucheza nje ya mpango wangu. Hivyo pamoja na yote nawapongeza vijana wengi tumefuzu sasa tunarudi kujiandaa na michezo ya ligi hili limekwisha.
Licha ya Rhino Rangers kutolewa lakini walionyesha kandanda safu ikiwemo kutengeneza hatari nyingi zaidi.
