Klabu ya Simba ipo kwenye hatua za mwisho za mazungumzo na kocha raia wa Ufaransa Fernando Da Cruz (50) ili kuchukua nafasi ya kocha wa zamani wa klabu hiyo Roberto Oliviera ‘Robertinho’ aliyetimuliwa kikosini hapo kufuatia kipigo cha gili 5-1 dhidi ya klabu ya Young Africans November 5 mwaka huu.
Fernando Da Cruz ana siku nne tangu ametua Jijini Dar Es Salaam kwaajili ya mazungumzo na klabu ya Simba akiambatana sambamba na msimamizi wake kutoka kampuni ya Arab Africano Football Management, na kama mazungumzo yatakamilika vyema klabu hiyo itamtangaza mapema wiki hii.
Fernando amewahi kuzifundisha klabu mbalimbali Barani Afrika ikiwemo AS FAR Rabat ya Morocco, lakini pia amewahi kuifundisha Royal Excel Mouscron ya Ubelgiji pamoja na Lille B ya Ufaransa, amefanya kazi kama skauti wa kusaka vipaji na klabu ya Lille OSC ya Ufaransa.
Fernando hajawahi kubeba ubingwa wowote akiwa kocha mkuu wa timu zote hizo alizowahi kuziongoza.
