Klabu ya Mchezo wa Mpira wa Kikapu kutoka Tanzania, ambao pia ndio mabingwa ligi ya mkoa ya Kikapu Dar es Salaam, Pazi imezidi kujiwekea mazingira magumu ya kufuzu hatua ya nusu fainali kuelekea kufuzu kushiriki michuano ya BAL 2024 baada ya kufungwa mechi yake ya pili jana kati ya tatu(3) wanazotakiwa kucheza.
Pazi walipoteza mchezo wa kwanza dhidi ya NBA Academy kwa vikapu 84-57 kwenye mchezo ambao hawakuwa kwenye wakati mzuri huku wakifanya kupoteza mipira mara nyingi(Turn-Overs) na kuruhusu kufungwa vikapu rahisi.
Mchezo wa pili uliopigwa jana usiku, Pazi walipoteza tena dhidi ya Cape Town Tigers ya Afrika ya Kusini kwa vikapu 87-95 huku timu ikionekana kupoteza umakini kwenye ukabaji hasa kipindi cha pili(Mwanzo wa robo ya 3).
Cape Town Tigers ina wachezaji nyota kama Mmarekani Terrance Ferguson, mchezaji wa zamani wa Oklahoma City Thunder ya NBA lakini pia ni timu ya zamani ya mchezaji wa sasa wa Pazi, Mmarekani mwenye asili ya Sudan, Dhieu Abwok Deing, ambaye licha ya kuwa na mchezo mzuri yeye binafsi, hakuweza kuisadia timu yake kuepuka kichapo.
Kama kuna namna yoyote Pazi wana dhamira ya kufufua matumaini ya kufuzu Nusu Fainali ya Elite 16 Road To BAL basi ni lazima washinde mchezo wao wa mwisho leo dhidi ya Dynamo.
Watanzania tupo nyuma yenu. KILA LA KHERI PAZI.
