MASHUJAA, MTIBWA SUGAR MAMBO SAFI, SINGIDA FG HOI

Mashujaa FC wamefanikiwa kusogea mpaka nafasi ya 12 kutoka nafasi ya 15 kwenye msimamo wa Ligi kuu Tanzania Bara bada ya kuwanyuka Namungo bao 1-0 kwenye mchezo uliopigwa Uwanja wa Lake Tanganyika, Kigoma.

Mashujaa walionyesha dhamira ya kutaka kuibuka na ushindi kwenye mchezo huu tangu dakika za mwanzo za mchezo wakifanya mashambulizi mengi kwenye lango la Namungo.

Dakika ya 28 Nyenyezi Mangapi alipiga faulo nzuri nje kidogo ya eneo la Namungo lakini golikipa Jonathan Nahimana aliokoa mpira huo.

Meddie Kagere alikosa nafasi ya wazi kuwapatia Bao Wauaji wa Kusini akiwa anatazamana tu golikipa, shuti lake likaenda nje.

Alikuwa ni Adam Adam aliyefaidika na mpira uliokuwa unazagaa zagaa eneo la hatari la Namungo kisha kuudhibiti vizuri na kupiga shuti kali lililomshinda Jonathan Nahimana aliyefanya kila jitihada kuokoa lakini wapi. Dakika ya 36, Mashujaa 1-0 Namungo.

Mapumziko Mashujaa walitoka wakiwa kifua mbele huku pia wakicheza vizuri sana kwa dakika 45 za kwanza.

Mashujaa walifanya mabadiliko kipindi cha pili kwa kumuingiza Emmanuel Mtumbuka nafasi ya David Ulomi lakini Namungo pia walimpumzisha Meddie Kagere na nafasi yake kuchukuliwa na Hassan Kabunda.

Timu zilionekana zote kutaka kupata matokeo, huku wakishambuliana kwa kupokezana. Namungo wakionekana kusukuma zaidi lakini wakishindwa kutumia vema nafasi zao.

Dakika ya 77 Namungo walidhani wamesawazisha lakini Kibendera tayari kilikuwa juu kabla pasi haijamfikia mfungaji.

Dakika ya 79 Mashujaa walifanya mabadiliko, Shaban Mgandila alichukua nafasi ya Balama Mapinduzi huku Nyenyezi Mangapi akitoka na nafasi yake kuchukuliwa na Jermanus Jospehat. Huku Namungo nao wakiamua kuongezea nguvu safu yao ya ushambuliaji wakimuingiza Kelvin Sabato kuchukua nafasi ya Pius Buswita.

Ibrahim Mkoko alitengewa pasi nzuri kabisa na Jacob Massawe lakini shuti lake likaenda nje kutokana na kukosa utulivu. Nafasi nyingine ya wazi walipoteza Namungo.

Mashujaa walifanya mabadiliko mengine dakika ya 90 akiingia Abdulnassir Assa Gamal nafasi ya Adam Adam.

Kila kitu kilionekana kwenda upande wa Mashujaa dakika za mwishoni kabisa. Wakipambana kuzuia na kulinda uongozi wao mpaka dakika ya mwisho wa mchezo na kuibuka na alama zote 3 muhimu.

Kwingineko huko Mwanza kwenye dimba la CCM Kirumba, Singida FG wameangukia pua baada ya kupokea kipigo cha mabao 2-0 kutoka kwa Mtibwa Sugar.

Singida FG wametimiza mechi ya 8 mfululizo bila ushindi wowote kwenye ligi kuu hali inayowaweka kwenye wakati mbaya kimwenendo.

Mtibwa Sugar walipata mabao yao mawili ndani ya dakika 5 kupitia kwa Abdul Hillary dakika ya 70 ya mchezo kabla ya Omary Marungu kuhakikisha wanaondoka na alama zote 3 kwa kukandamazi msumari wa pili kwenye Jeneza la Singida FG dakika ya 75.

Mtibwa Sugar sasa wanafikisha alama 12 wakiwa bado wapo nafasi ya 16.