Kagera Sugar wamepata ushindi wa 2-1 dhidi ya Tanzania Prisons kwenye mchezo uliokuwa na ushindani lakini pia ufundi wa aina yake. Kagera wanafikisha alama 12 na kusogea hadi nafasi ya 6 wakimmshusha JKT Tanzania, huku Tanzania Prisons wakisalia nafasi ya 14 na alama zao 7.
Kagera Sugar walipata bao la utangulizi dakika ya 20 ya mchezo kupitia kwa Obrey Chirwa aliyefunga kwa njia ya mkwaju wa penati baada ya yeye mwenyewe kufanyiwa madhambi na Salum Mashaka Kimenya kwenye eneo la goli.
Tanzania Prisons walijaribu kujibu mashambulizi kutaka kusawazisha haraka haraka. Wakitumia zaidi mapana ya uwanja kwa kuwatumia Zabona Mayombya na Edwin Balua lakini walikutana na upinzani mkubwa kutoka kwa Datius Peter na Dissan Galiwango kwenye pembe hizi. Mchezo mgumu kwa Prisons mpaka dakika za 40.
Zikiwa zimeongezwa dakika 2, Kagera Sugar walipata nafasi ya wazi kujipatia nafasi ya goli la 2. Mabeki wakikosa mawasiliano na kupiga pasi fupi iliyonaswa na Chirwa na kummpasia Ally Nassoro Ufudu ambaye naye alimmtengea pasi nzuri Cleophace Mkandala lakini shuti lake halikulenga lango.
Mapumziko wenyeji Kagera Sugar walitoka kifua mbele kwa bao 1-0.
Kipindi cha pili kilianza na kasi kwa timu zote mbili. Ni kama mchezo ulikuwa unaanza upya, yakifanyika mabadiliko kadhaa kwa timu zote, Wakiingia Hamisi Mcha na Beno Ngassa nafasi za Edwin Balua na Zabona Mayombya kuingiza kasi mpya kwenye pembe za kulia na kushoto upande wa Prisons huku Said Naushad akiingia nafasi ya Abiud Mtambuka sehemu hihiyo ya pembeni pia ikimmfanya Chirwa kucheza kama mshambuliaji wa Kati.
Dakika ya 65 Cleophace Mkandala alitumia udhaifu wa walinzi wa Prisons kuwapatia Kagera Sugar bao la pili baada ya kazi nzuri ya Dissan Galiwango akitokea pembeni, aliyepiga pasi iliyoshindwa kuokolewa vizuri na kummkuta mfungaji aliyemalizia kwa shuti kali.
Hamisi Mcha, aliirudisha Tanzania Prisons mchezoni dakika ya 71, baada ya kutumia mpira ulioshindwa kuokolewa vizuri na walinzi wa Kagera Sugar Sugar wakati wakiwa kwenye harakati za kuzuia shuti.
Prisons walicharuka wakiamini bado wana nafasi ya kupata goli la pili. Kagera Sugar nao wakizidisha jitihada kwenye kulinda ushindi wao.
Dakika 90 zikamalizika kwa wenyeji Kagera kupata ushindi wa 2-1.
