Nyota wa klabu ya Yanga na mlinda lango wa timu ya Taifa ya Tanzania Metacha Mnata ameeleza hali ya kikosi chao kuwa iko vyema kuelekea mchezo wa leo dhidi ya Tanzania Prisons.
Mnata amesema kuwa Tanzania Prisons wataingia kwa kujilinda zaidi hivyo watalazimika kuwalazimisha kufungua eneo lao la ulinzi ili wapate goli kipindi cha kwanza na kipindi cha pili.
“Tanzania Prison watakuja kwa kujilinda, tutalazimisha kupata magoli kipindi cha kwanza na kipindi cha pili na maandalizi yako vizuri, naamini tutapata ushindi mapema”, Alisema Metacha.
Kwa upande wa Tanzania Prison kocha msaidizi wa klabu hiyo Shaban Mtupa amesema licha ya ubora ambao Yanga wanao lakini wana madhaifu ambayo wameyafanyia kazi mazoezini.
Mtupa amesema mchezo huo upo kwenye malengo yao na ni miongoni mwa timu michezo mitano ambayo walikusudia kuvuna alama ili waendelee kusalia sehemu salama.
“Tumepata muda wa kutosha wa maandalizi ya mchezo wetu dhidi ya Yanga, tumefanya kila kitu ili tupate matokeo”.
“Tunaenda kucheza na Yanga nzuri ambayo ina wachezaji wazuri, ambao wanaweza kuamua matokeo wakati wowote,”.
“Yanga ni timu nzuri lakini pamoja na uzuri wao wana madhaifu, kwahiyo tumeyafanyia kazi kwenye uwanja wa mechi”, alisema Shaban Mtupa.
Mchezo huo utapigwa majira ya saa kumi [16:00] jioni katika uwanja wa CCM Sokoine, Jijini Mbeya, Yanga inaongoza msimamo wa Ligi huku Tanzania Prison ikishika nafasi ya tisa ya msimamo.
