PRISONS, KMC ZATOSHANA NGUVU SOKOINE

Tanzania Prisons na KMC wametoshana nguvu kwenye mchezo wa ligi kuu ya NBC Tanzania Bara uliopigwa kwenye dimba la Sokoine jijini Mbeya uliomalizika kwa sare ya 1-1.

KMC walitangulia kupata goli kupitia kwa Abdulkarim Abdullah dakika ya 11 ya mchezo akitumia makosa ya golikipa Yona Amos na kupachika mpira wavuni.

Prisons waliuchukua mchezo muda mwingi wa kipindi cha kwanza baada ya hapo wakiwalazimisha KMC kucheza chini kwenye eneo lao, hata hivyo hawakuweza kusawazisha na mpaka mapumziko, KMC walikuwa mbele kwa bao 1-0.

Kipindi cha pili hakikuwa na hadithi tofauti, Prisons waliendelea kuutawala mchezo kwa nyakati nyingi. KMC waliendelea kuwa timu ya pili kiwanjani huku wakikubali kucheza chini kulinda Uongozi wao.

Mabadiliko ya Kimbinu ya Kocha Hamad Ally kuwainginza Salum Kimenya na I Ibrahim Abraham kucheza kama walinzi washambuliaji kuliongeza kasi ya mashambulizi lakini KMC waliendelea kubaki imara.

Dakika ya 81, alikuwa ni Ibrahim Abraham aliyeisawazishia Prisons na angalau kuwapa alama 1 walioistahili japo walistahili zaidi kulingana na walivyokuwa wakicheza akitumia vizuri mpira wa krosi uliochongwa na Salum Kimenya.

Dakika zote 90 zikatamatika kwa kugawana alama 1, 1 na kujikuta wote wakibaki kwenye nafasi zao, KMC nafasi ya 6 na Tanzania Prisons nafasi ya 5.