VITA KUNAKO AMAAN LEO, SIMBA V SINGIDA FG

Singida FG watamenyana na Simba Sports Club hii Leo kwenye mchezo wa Kundi B ya michuano ya Mapinduzi Cup kwenye Uwanja wa New Amaan Complex majira ya 2.15 Usiku.

Ni mchezo muhimu kwa timu zote 2 kuelekea kukata tiketi ya kufuzu Robo Fainali ya michuano hii inayotifua vumbi haswa huko visiwani Zanzibar.

Singida FG tayari wamevuna alama 6 baada ya kucheza michezo miwili[2] wakishinda 4-1 dhidi ya JKU na 3-1 dhidi ya APR ya nchini Rwanda. Leo watakuwa wanatafuta ushindi wake wa 3 kwenye kundi hilo ili kuvuna alama zote 9 na kufuzu Robo Fainali. Lakini pengine hata Sare inaweza kuwatosha.

Simba wamecheza mechi 1 tu mpaka hivi sasa dhidi ya JKU wakiibuka na ushindi wa 3-1 na kuwa na alama 3 wakishika nafasi ya 2 kwenye msimamo wa kundi hilo. Wanajua kuwa ushindi wa leo ni muhimu zaidi kwao ili kuweka angalau nafasi kubwa ya kufuzu hatua inayofuata kabla ya mchezo wao wa mwisho dhidi ya APR.

Ugumu zaidi wa mchezo huu unachagizwa na matokeo ya awali kwenye mchezo wa ligi kuu Tanzania Bara ambapo Singida FG waliambulia kichapo kutoka kwa Simba cha mabao 2-1 wakiwa nyumbani, Liti Stadium, Singida. Unatarajiwa kuwa mchezo wa kisasi kwa kiasi chake.

Kocha Thabo Senong amekuwa na nyakati bora akiwa na kikosi cha Singida FG kama kocha wa muda. Timu ikionekana kucheza vizuri kwa muunganiko lakini hata kwa namna anavyokuwa mwepesi kuusoma mchezo na kufanya mabadiliko kumekuwa na faida kubwa sana kwa timu yake.

Ubora wa vikosi vyote viwili pia ni sababu nyingine ya mchezo huu kuwa na msisimko wa aina yake. Timu zote zimekuja Zanzibar kwenye mashindano zikiwa na vikosi vyao kamili ukiacha wale walio timu za Taifa hasa Simba. Inatarajiwa kuonekana ladha ya Ligi kuu kwenye michuano ya Mapinduzi hii leo.

Aidha, ndoto kubwa ya Singida FG ya kuwa timu kubwa na yenye mafanikio inawafanya kuwa timu ya kuogopwa sana. Wanafainali hawa wa mashindano haya msimu uliopita watatamani kurudi tena Fainali msimu huu. Huku pia timu kubwa ikipimwa kwa mafanikio yake, ni wazi kuwa kupata ubingwa wa Mapinduzi itakuwa ni hatua ya kwanza.

Ni Masaa tu yanahesabiwa kuelekea mchezo huu mkubwa pengine kuliko yote iliyokwishachezwa mpaka hivi sasa kwenye mashindano haya Mapinduzi msimu huu. Singida FG v Simba SC ni Vita kwenye Amani!